អ្នកស្លាប់កើនឡើងដល់ ១១១២នាក់ និងអ្នកជំងឺជាង ៤ម៉ឺននាក់ ខណៈជាង២០ប្រទេស មានអ្នកជំងឺវីរុសកូរ៉ូណានេះ…

អ្នកស្លាប់​ដោយសារ​ជំងឺ​រលាក​សួត​បង្កដោយ​មេរោគ​កូ​រ៉ូ​ណា​ប្រភេទ​ថ្មី (2019-nCoV) ឡើងដល់​នាក់​១១១២​នាក់​ហើយ បើ​គិត​ត្រឹម​ម៉ោង​៥ និង​៤៥​នាទី ព្រឹក​ថ្ងៃ​ពុធ ទី​១២ ខែកុម្ភៈ នេះ​។ តួលេខ​នេះ កើន​ពី​ចំនួន​១០១៨​នាក់ កាលពី​ថ្ងៃ​ម្សិលមិញ​។ ករណី​ស្លាប់​នៅក្រៅ​ប្រទេស​ចិន មានតែ​១​ករណី​ប៉ុណ្ណោះ​នៅ​ហ្វីលីពីន និង​១​ករណី​ទៀត​នៅ​ហុងកុង ដែលជា​តំបន់​រដ្ឋបាល​ពិសេស​របស់​ចិន​។​ នេះបើយោងតាមសារព័ត៌មានថ្មីថ្មី ដែលចុះផ្សាយនៅព្រឹកថ្ងៃទី១២ កុម្ភៈ នេះ។

ទិន្នន័យ Tracking Coronavirus របស់ BNO News បង្ហាញ​ផងដែរ​ថា តួលេខ​អ្នកជំងឺ​កើន​ឡើងដល់​ប្រមាណ​៤៥ ០០០​នាក់ នៅ​ប្រទេស​ចំនួន​២៥ ដោយ​ភាគច្រើនបំផុត​នៅ​ចិន ជាពិសេស​នៅ​ក្រុង​វូ​ហាន​ដែលជា​កន្លែង​ផ្ទុះ​ជំងឺ​។

អ្នកជំងឺ​ជាង​៨០០០​នាក់ ត្រូវបាន​រាយការណ៍​ថា ស្ថិតក្នុង​ស្ថានភាព​គ្រោះថ្នាក់ រីឯ​ប្រមាណ​៤៥០០​នាក់ បាន​សះស្បើយ និង​ត្រូវបាន​អនុញ្ញាត​ឲ្យ​ចេញពី​មន្ទីរពេទ្យ​។​ ​អ្នកស្លាប់​៩៤​នាក់​បន្ថែមទៀត​ក្នុង​ខេត្ត Hubei ធ្វើ​ឲ្យ​ចំនួន​អ្នកស្លាប់​នៅ​ខេត្ត​នេះ ឡើងដល់​១០៦៨​នាក់ ដោយ​ភាគច្រើនបំផុត​នៅ​ក្រុង​វូ​ហាន​។​ ​ក្រៅពី​ចិន និង​រដ្ឋបាល​ពិសេស​ហុងកុង ម៉ា​កាវ និង​តៃវ៉ាន់

ប្រទេស​២៤​ផ្សេងទៀត​ដែលមាន​អ្នកជំងឺ​កូ​រ៉ូ​ណាវី​រុស​រួមមាន ជប៉ុន (​បញ្ចូល​ទាំង​អ្នកជំងឺ​នៅលើ​នាវា​ទេសចរណ៍ Diamond Princess) ថៃ សិង្ហ​បុរី កូរ៉េខាងត្បូង អូស្ត្រាលី ម៉ាឡេស៊ី បារាំង សហរដ្ឋអាមេរិក អាល្លឺម៉ង់ វៀតណាម អេ​មី​រ៉ា​ត​អារ៉ាប់​រួម កាណាដា អ៊ីតាលី រុស្ស៊ី ចក្រភព​អង់គ្លេស កម្ពុជា ហ្វាំ​ង​ឡង់ ឥណ្ឌា ណេ​ប៉ាល់ ហ្វីលីពីន ស្រីលង្កា ស៊ុយអែត អេ​ស្ប៉ា​ញ និង​បែលហ្ស៊ិក​៕